اغرب الاجابات التى اسمعها عندما اسال الناس عن مرشحى الرئاسة هى "لسة لسة الرئيس بتاعنا حيجى" دا اولا على اساس ان الانتخابات الرئاسية حتى سنة 2014 وبعض التكهنات الغير مؤكدة تماما بتقول ان الرئاسية فى مارس او ابريل 2012 والان هو سبتمبر 2011 اى هناك خمسة شهور وقول شهر اخر حتى يصل المهدى المنتظر فبالتالى حيبقى متبقى خمس شهور ؟؟ كيف تسمح لى بمناقشة رئيس قادم لمصر فى خلال الخمس شهور طب بذمتك يا اخى دول حيقضوه لف فى المحافظات والجاليات الخارجية وحبة اطلالات توك شوهية وحيجى امتى فى "العاشرة مساءا " و "فى الميدان" و "القاهرة اليوم" و "الحياة اليوم" حيجيب منين ؟؟ للايام دى كلها تعرفوا بالبلدى ايه المشكلة ؟؟؟ اصلنا مستنين "بابا" "القائد العظيم المغوار المستقر الهادى الرزين" اللى يحطنا على بر الامان مستنين "فرعون" نفرعنه متعودناش نجيب موظف اتعودنا نجيب "بابا" وزوجته هى "ماما" وولاده هما زينة شباب البلد حد يربيه القائد ويبقى برده قليل او مواطن عادى عايزين راجل يعيشنا فى امان ويرجع البلد للاستقرار ويرجع قانون طوارىء ويعتقل تانى مفيش مشكلة اكيد هو صح ؟؟ عايزين واحد فوق السبعين لانه شاف كتير فى حياته قتل واتقتل ناضل وصارع ادار ونجح وعايزينه كاريزما ومش اجندات وراجل مش متدين اوووى ولا فاجر احنا عايزين راجل يزلوط معانا ونشوفه فى صلاة الجمهة عايزينه يظهر فى ليلة القدر ويبعت برقية للبابا ويبقى حارب او حتى خد جوايز مش شرط نوبل حتى الدولة التشجيعية ممكن دكتور او حتى "سيد" بس بلاش شيخ ياعم هى ناقصة دين اما احنا ما اختارناش على اساس دين يجى واحد يحكم بالدين عايزين حد نطلب منه ونستنى اكرامياته برقياته بعد الماتشات الكبيرة واحد نهديله اى تفوق نعمله ويزور المنتخب ويدعمه ويحب "تامر" بقى عايزين جديد ويشرب سجايره قدامنا احنا ستره وغطاه بس فى صلاة العيد يقولنا كلمة حلوة عايزينه راجل يحبوه شوية صحفبن يباركوا خطواته ويمجده بطولاته عايزين ديكتاتور حلو وسيم شوية شعره الابيض مغطى سواده ومايصبغش كله هيبة ووقار عايزينه ميطلعش غير على القناة الاولى ويبقى مع الاسرائيلين حلو ولذيذ واهم حاجة يبقى سريع يدينا المصروف هو بابا وحقنا عليه يعنى لو سرق مليار انا عايز مليون .؟؟؟ حقى فى ابويا مالكم انتوا ؟؟؟ ولو قتل ولادوا وكانوا بيشتموه والصباع اللى يوجعك اقطعه عايزين رئيس ميعرفش عن العشوائيات غير انها فى السودان فى منها والناس اللى ساكينين فيها بيدلعوا ع البلد نهاركم سعيد فى انتظارك يا "ابابا" كله سماحة وزوق وصراحة ويحل المشكلة بالراحة ويقولنا ع البير وغطاه وعشان كدا احنا اخترناه"
No comments:
Post a Comment